Daar was
trane van blydskap en hartseer toe die nuwe jaar begin met die aankondiging van
die matriekuitslae. Die departement van basiese onderwys het ’n slaagsyfer van
75,8% aangekondig, wat laer is as die klas van 2013.
In
werklikheid is die matriekuitslae maar eintlik ’n hartseer verhaal en wonder ’n
mens of daar lig aan die einde van die tonnel is?
Die basiese
onderwysdepartement is nie verkeerd as hulle die slaagsyfer aan ons gee nie,
maar dit is die slaagsyfer van die aantal kandidate wat die nasionale senior
sertifikaateksamen geskryf het.
Terwyl ons
kan bly wees vir die meer as 75%, moet ons egter vra hoeveel het in 2003 hul
skoolloopbaan begin, maar oor die twaalf jaar uitgeval en nie die nasionale
senior sertifikaateksamen geskryf nie?
Syfers van
die departement van basiese onderwys dui daarop dat 1 252 071 leerders die
skoolstelsel in 2003 in graad 1 begin het (hulle sou die klas van 2014 word).
Uit hierdie
groep, het 688 660 leerders dit gemaak tot die matriekeksamen.
Dit beteken
slegs sowat 55% van die 2003 graad 1-leerders kom deur ’n twaalf jaar
skoolloopbaan, terwyl 563 411 leerders êrens langs die pad uitgeval het.
As jy die
2014-syfers vergelyk met dié van 2013, sal jy oplet dat die aantal kandidate
wat die 2013 nasionale senior sertifikaateksamen geskryf het, altesaam 623 897
was, terwyl 1 286 591 leerders graad 1 in 2002 betree het. Daar het dus 662 695
langs die pad uitgeval
Sou jy die
aantal leerders vat wat in 2003 hul skoolloopbaan begin het en dit vergelyk met
die aantal wat in 2014 geslaag het, is die werklike slaagsyfer sowat 41,7%, wat
ook beteken slegs sowat ±12% het toegang tot nagraadse studies verwerf.
Die getal
leerders wat ons nie in berekening neem nie, en êrens in die 12 jaar uitgeval
het, sien ons of moet ons hulle nie sien as diegene wat dit nie gemaak het nie?
Die
realiteit is dat dié wat in die 12 jaar uitgeval het ook landsburgers is wat
nou ook deel van óf die arbeidsmark óf die werkloosheidsyfer is, nes die
kandidate wat nie gaan studeer nie.
Ek wil my
verstout en self afvra, diskrimineer ons tog nie maar teen hulle wat om een of
ander rede uitgeval het nie?
Die ander
saak is, as jy uit die bus geval het en jy besluit later om jou matriek te
voltooi by ’n kollege, gaan jy tel onder die matrieks met wie jy aanvanklik sou
skryf of tel jy onder die jaar wat jy matriek voltooi het en word die aantal
kandidate wat matriek by tersiêre instellings voltooi, by die aanvanklike
matriekslaagsyfer bygevoeg of bly dit maar ’n persentasie wat in die lug hang?
Indien ons
daardie persentasie wat by kolleges hul matriek voltooi by die jaar moet voeg,
lyk die slaagsyfer dan beter of slegter vir ons land?
Het dit nie
dalk tyd geword dat ons ’n ekstra kolom of twee byvoeg wanneer die
matriekuitslae aangekondig word nie, of sal ons die aantal leerders wat die
skoolstelsel saam met die matrieks ingekom het maar in die 12 jaar uitgeval
het, net bytel en die regte persentasie gee?
Ek het ook
opgemerk verskeie sake-ondernemings was goedhartig met die skenk van
tegnologiese toestelle, soos tablette, aan die topleerders. Dit is goed, maar
moet ons nie besighede kry om te belê in ons skole vóór die leerders in matriek
is nie om dus só ons slaagsyfer bietjie hoër te maak? As ons onder begin, kan
ons bo die vrugte pluk. Voordat enigeen gaan sit vir die matriekeksamen, moet
jy eers 11 ander grade voltooi.
As
opvoeding vir ons as land so belangrik is, soos ons onsself oortuig, sal ons
nie net elke jaar fokus op ’n matriekslaagsyfer nie, of kandidate wat net slaag
nie. Ons sal ook na ons ander grade moet begin kyk. Die matriekeksamen begin
immers nie in graad 12 nie.
- Oorspronklike opinie het in Paarl Post rubriek van Donderdag 5 Februarie 2015 verskyn
No comments:
Post a Comment